Arresting officer binoga ng tanod, suspek sugatan din

SUGATAN ang isang pulis makaraan pagbabarilin ng isang barangay tanod habang inaaresto ng mga awtoridad ang dalawang lalaking kapitbahay ng suspek sa bisa ng warrant of arrest kamakalawa sa Quezon City.

Sa ulat ng Quezon City Police District – Criminal Investigation and Detection Unit (QCPD-CIDU), kinilala ang sugatang pulis na si PO2 Eduard Paggabao, ng QCPD Lagro Police Station 5, tinamaan ng bala sa ibaba ng dibdib.

Habang sugatan din ang suspek na barangay tanod na si Isandro Pre, 43, residente ng Champaca St., Brgy. Pasong Putik , Fairview, ng nasabi ring lungsod.

Ayon sa ulat, naganap ang insidente dakong 1 a.m. sa Champaca West St., Brgy. Pasong Putik. Habang isinisilbi ni PO2 Paggabao ang warrant of arrest kina Elmer Pajarito at Angel Villanueva, nang paputukan siya ni Pre at tinamaan si Paggabao. Bagama’t sugatan ay gumanti ng putok si PO2 Paggabao na ikinasugat ni Pre.

Bunsod nito, nakatakas ang dadalawang aarestuhin sana na sina Pajarito at Villanueva.