Maricel at Billy, nag-reunion

NAKATUTUWANG makitang magkasama muli ang Diamond Star na si Maricel Soriano at Billy Crawford sa isa sa mga campaign sorties ni Mar Roxaskamakailan sa Bulacan.

Maaalalang unang nagkasama sa isang proyekto sina Marya at Billy noong 2013 nang gawin nila ang  Momzillas  kasama sina Eugene Domingo at Andi Eigenmann. Mag-ina ang papel na ginampanan nina Maricel at Billy sa nasabing pelikula na idinirehe ng yumaong Wenn V. Deramas.

Kapwa naging emosyonal sina Maricel at Billy sa ‘di inaasahang pagpanaw ni Direk Wenn dahil dalawa sila sa pinaka-paboritong mga artista ng blockbuster director. ”Para siyang angel kasi siya ang laging nagpapaalala sa akin na ‘let God’ tuwing may mga problema akong hinaharap sa buhay,” sabi ng original Taray Queen.

“Totoong tao si Direk Wenn at napakabait niyang kaibigan. Siya ang dahilan kung bakit nakatrabaho ko si Inay Marya at marami pang mahuhusay na artista. Talagang malaki siyang kawalan sa industriya,” dadagdag pa ni Billy.

Sobrang naging close sina Maricel at Billy dahil sa proyektong ginawa nila kasam si Direk Wenn kaya naman aliw na aliw ang mga tao sa kulitan nila sa entablado habang ikinakampanya si Roxas. ”Para talaga kaming mag-ina. Makulit na bata itong si Billy at sobrang palabiro. At proud na proud ako sa kanya dahil super successful ang kanyang career. Very hard working kasi ito,” sabi ni Maricel.

“Ako naman, marami akong natutuhan kay Inay Mary. Ang husay ng comedic timing niya. Paano ba naman, lumaki siya kasama si Mang Dolphy na isang nirerespetong institusyon ng mga batang artista na katulad ko. Ibang klase ang professionalism at dedication ni Inay sa kanyang craft bilang aktres. Proud son ako ng nag-iisang Diamond Star,” sabi ni Billy ng buong pagmamalaki.