Dagdag-sahod ng gov’t employees sa EO ni PNoy (SSL-4 sa Kamara bigo)

MAKATATANGGAP ng umento sa sahod ang mga opisyal at kawani ng gobyerno sa pamamagitan ng isang executive  order na lalagdaan ni Pangulong Benigno Aquino III.

Ito ay bunsod nang kabiguang maipasa sa Kamara de Representantes at Senado ang panukalang Salary Standardization Law 4 na magtatakda ng wage hike sa mahigit isang milyong manggagawa sa pamahalaan.

Ayon kay Budget Secretary Florencio Abad, inihahanda na nila ang rekomendasyon sa Pangulo para sa posibleng pagpapatupad ng first tranche ng salary increase para sa government employees base sa SSL 4 bill.

Umaabot sa kabuuang P57.9-B appropriation ang kasama sa inaprubahang General Appropriations Act of 2016 para sa first tranche ng wage hike.

Samantala, ang second tranche ay nakapaloob na sa National Expenditure Program (NEP) para sa taon 2017.

Ang panukalang national budget sa 2017 ay isasalin naman aniya sa susunod na administrasyon para sa pagpapatupad ng SSL 4.