Donaire, Nietes, Tabuena sa PSA Awards

MARKADO noong nakaraang taon sina world champions Donnie Nietes at Nonito Donaire, Jr. sa boxing at si Asia Tour winner Juan Miguel Tabuena sa golf dahil sa mga karangalang ibinigay sa Pilipinas.

Kaya naman sosyo ang tatlo sa MILO-San Miguel Corp.-Philippine Sportswriters Association Athlete of the Year sa Annual Awards Night sa One Esplanade sa Pasay City sa darating na Pebrero 13.

Nakakaapat na si Donaire sa nasabing awards, una noong 2012, 2011 at 2007, habang una pa lang nina Nietes at Tabuena.

Lumaban noong isang taon si Donaire sa pagbaba ng weight na super-bantamweight.

Sa tatlong panalo noong 2015, pinakamalaki ang kay Mexican Cesar Juarez sa dikdikang bugbugan para sa WBO super-bantam title sa San Juan, Puerto Rico.

Habang si Nietes ang longest reigning Filipino world boxing champion nang sapawan ang matagal na panahong rekord na 7 years, 3 months ni Gabriel ‘Flash’ Elorde.

Nagtagumpay sa title defense ng 108-lb belt kontra kina Mexicans Gilberto Parra, Francisco Rodriguez, Jr. at Juan Alejo si Nietes.

At sinikwat ni Tabuena, 22, ang trono ng 98th Philippine Open sa Luisita Golf and Country Club sa Tarlac. ( ARABELA PRINCESS DAWA )