Janella, nabastos ng event host

Usaping Haunted Mansion naman ay hindi napigilan ni Janella Salvador na hindi maglabas ng sama ng loob sa ginawa sa kanya ng event host sa Christmas party na siya mismo ang special guest dahil endorser siya ng produkto nito.

Sabi ni Janella ay ang mommy niyang si Jenine Desiderio ang nag-post sa kanyang social media account na nakalimutan ng host ang pangalan ng aktres nang ipakikilala na siya.

Napaka-iresponsable raw ng event host na kinuha ng organizers ng Christmas party.

“It was a Christmas party para sa isang endorser ko, hindi ko na lang papangalanan.

“Hindi ko lang in-expect na ganoon ang mangyayari. Kasi it was for my endorsement, ‘di ba? So, nakababastos lang. Na-off lang ako alam mo ‘yung feeling na ganoon na parang napahiya ka sa sarili mong event,” kuwento ni Janella.

Hindi na lang daw ipinahalata ni Janella ang pagka-asar niya sa event host dahil gusto niya good vibes lang.

Sobrang pasalamat naman si Janella sa mommy na unang nagtanggol sa kanya.

“Tingin ko naman ganoon talaga ang mga mommy. Protective sila sa mga anak nila,” anang dalaga.

At sa darating na Disyrembre 25 ay kabado sina Janella, Mario Mortel, at Jerome Ponce dahil first time nilang mapapasama sa Metro Manila Film Festival at ang lalaki pa raw ng mga kalaban.

”I believe in our movie, kay direk Jun Lana, sa staff at sa lahat ng cast. This is the scariest movie for this year’s MMFF.

“Kaya sana suportahan nila. Hindi po kami mapapahiya sa inyo kapag pinanood n’yo ang ‘Haunted Mansion’. If you’re a fan of ‘Shake Rattle & Roll’, you’ve got to see this movie,” saad ni Janella.

Sabi naman ni Mario, ”Dapat panoorin n’yo ito kasama ang barkada o tropa n’yo para mas masaya.

“Mas okey ‘pag marami kayong papasok sa sinehan para sabay-sabay kayong matatakot at magsisigawan.”

Kaya sa fans ng Shake, Rattle and Roll, heto ang kapalit, Haunted Mansion na sa December 25.

FACT SHEET – Reggee Bonoan