Anthony Player of the Week

NOONG Martes ay ipinakita ni Sean Anthony kung bakit siya ang napili bilang Player of the Week ng PBA Press Corps.

Dalawang free throw ni Anthony sa huling 8.8 na segundo ang nagselyo sa 93-91 na panalo ng kanyang koponang North Luzon Expressway kontra sa dati niyang koponang Meralco sa PBA Smart BRO Philippine Cup.

Nagtala si Anthony ng 19 puntos, siyam na rebounds at apat na assists bilang followup sa kanyang 32 puntos at 12 rebounds sa naunang panalo ng Road Warriors kontra Talk n Text noong Biyernes.

Dahil dito ay umangat ang NLEX sa kartang apat na panalo at dalawang talo kaya umaasa si Anthony na makakaangat ang Road Warriors sa PBA pagkatapos ng kanilang mahabang dominasyon sa PBA D League.

Dating naglaro si Anthony para sa Powerade, Barako Bull, Talk n Text, Air21 at Meralco bago siya napunta sa NLEX dahil sa patakaran ng PBA kung saan limang Fil-Ams lang ang puwedeng maglaro sa isang koponan.

Pinakawalan si Anthony pagkatapos na makuha ng Meralco si Jimmy Alapag.

( James Ty III )