HATAW! D'yaryo ng Bayan hatawtabloid.com
PAALIS na ngayon ang Barangay Ginebra San Miguel, Alaska Milk at Mahindra patungong Dubai para sa dalawang larong gagawin doon para sa PBA Smart Bro Philippine Cup.
Maglalaban ang Aces at Enforcers sa Sabado, Nobyembre 7 at kinabukasan ay maglalaban ang Aces at Gin Kings sa dalawang laro sa Dubai kung saan sisikapin ng tropa ni coach Alex Compton na mapanatili ang kanilang malinis na kartang 2-0.
Huling naglaro ang PBA sa Dubai noong Governors Cup kung saan sumabak doon ang Ginebra, Rain or Shine at Globalport.
Kinuha ng Alaska ang rookie ng Letran na si Kevin Racal bilang pangdagdag sa kanilang lineup.
Si Racal ay naging bida sa pagkakampeon ng Knights sa NCAA Season 91 kamakailan.
Samantala, kinompirma ni PBA Media Bureau Chief Willie Marcial na dadayo ang liga sa Taipei sa Governors’ Cup sa susunod na taon at planong bisitahin ng liga ang Qatar at Saudi Arabia.
“We’ve had initial talks with the Qatar and Saudi groups. They have expressed clear intention to host PBA games. Our prospective Qatar host is the Qatar basketball federation, no less,” wika ni Marcial.
Simula sa Linggo, Nobyembre 8 ay dadayo ang PBA sa Philsports Arena sa Pasig para sa apat na playdates doon.
Ang Philsports o dating ULTRA ay naging venue ng liga noong dekada ’80.
Sinabi ni PBA Deputy Commissioner Rickie Santos na ayos na ang bubong, dugout at aircon ng PhilSports para maging mas kaaya-aya ang panonood ng mga laro roon.
(James Ty III)
