Halikan nina Piolo at Sarah, pinaalis ni Mommy Divine? (Dahil daw sa violent reaction…)

 

TALBOG – Roldan Castro . 

AYAW magbigay ng detalye nina Piolo Pascual at Sarah Geronimo tungkol sa kissing scene nila sa The Breakup Playlist na showing sa July 1. May kinalaman kaya ito sa napapabalitang may violent reaction umano si Mommy Divine nang malaman ito?

Hindi kaya inaayos muna si Mommy Divine at kailangang mapapayag ito na maipalabas ang nasabing kissing scene?

“Abangan n’yo po sa pelikula, maiinggit kayo,” bitin na pahayag ng Pop Princess.

Nag-react din si Sarah sa mga naglalabasan na wish niyang makahalikan si Papa P.

“Baka naman iniisip ni Piolo, eh pinagpapantasyahan ko siya ng sobra-sobra. Kaunti lang naman. Ha! Ha! Ha! Baka matakot na siya sa akin,” bulalas niya.

Aminado sina Piolo at Sarah na may playlist din sila noong dumating na may pinagdaanan ang kanilang lovelife.

Sey ni Papa P, kahit ano ang pinagdaraanan sa buhay ay mayroon siyang musical scoring para saktan pa ang sarili niya.

“Torture pa more,” sambit niya.

Sey naman ni Sarah, kailangang pagdaanan mo ang bawat emosyon ‘pag nakipag-break ka or else ay mababaliw ka.

“Ano ka, robot? Ano ka? Kailangan mong pagdaanan ‘yon,” madiin niyang pahayag.

Nag-share rin siya ng nararamdaman noong ma-hurt ang puso niya. Hindi na pinangalanan kung sino ‘yun pero noong time na ‘yun ay naghiwalay sila ni Rayver Cruz.

“Naalala ko po noong ako ay nasasaktan, magkasama kami ni Ate Juday sa ‘Hating Kapatid’, gumagawa kami ng pelikula. O, basta ‘yun. May music, nakalimutan ko na ‘yung music, basta heartbreak song siya. Nilakasan namin ‘yung tugtog. Kumakanta kami, umiiyak ako, ganyan. Kasi part ng healing process ‘yan, eh. ‘Yung alagaan mo ‘yung sakit until mawala,” kuwento niya.

Hirit pa niya na ang Breakup Playlist ay pag-aalaga sa emotions. Pero natagpuan naman niya ang happiness sa piling ni Matteo Guidicelli. Masaya ngayon ang puso niya.

“Siyempre wala naman hong ano, eh, bawat sitwasyon, wala namang perpektong sitwasyon. Kailangan mo lang ipagdasal na kung ano ‘yung kalooban ng Diyos, ‘yun ang mangyayari sa bawat relasyon na pinapasukan mo.”

Tsuk!