Cavs kinapos sa Warriors

 

DOBLE kayod ang kinana ni basketball superstar LeBron James matapos magtala ng triple-double performance pero hindi pa rin sumapat para makuha ng Cleveland Cavaliers ang panalo sa Game 5 Finals ng 2014-15 National Basketball Association (NBA) kahapon.

Umangat ang Golden State Warriors sa 3-2 serye matapos ilista ang 104-91 panalo laban sa Cavaliers at mamuro sa pagsungkit ng unang kampeonato.

Kumamada ng 40 points, 14 rebounds at 11 assists si four-time MVP James sumegundo sa kanya si forward Tristan Thompson na may binakas na 19 puntos, 10 boards at dalawang blocks.

Dikitan ang naging laban mula umpisa hanggang sa kalagitnaan ng fourth quarter.

Hawak ng Warriors ang 85-82 bentahe at naidikit pa ng Cavs sa isang puntos, 85-84 sa isang hook shot ni Thompson mula sa pasa ni James may 5:10 minuto na lang sa fourth period.

Bumira ng 6-0 run sa Warriors, lima ay galing kay veteran Andre Iguodala para sa 91-84 abante may 3:45 na lang sa orasan.

Dinala ni MVP Stephen Curry ang opensa ng Warriors matapos magtala ng 37 markers, pitong rebounds at apat na assists habang nag-ambag sina Draymond Green at Iguodala ng 16 at 14 puntos ayon sa pagkakasunod.

Kailangan manalo ang Cavaliers sa Game 6 na lalaruin sa Cleveland para makahirit ng do-or-die Game 7.

(ARABELA PRINCESS DAWA)