HATAW! D'yaryo ng Bayan hatawtabloid.com
Kinalap ni Tracy Cabrera
NANINIWALA si Alex Ariza, dating strength and conditioning coach ni Manny Pacquiao, na hindi matutuloy ang laban ng People’s Champ kontra sa walang-talong si Floyd Mayweather Jr.
“Hindi ito mangyayari. Lalaban kami sa Mayo 2 pero hindi si Manny Pacquiao,” sambit ni Ariza sa panayam ni Steve Angeles sa ABS-CBN.
“Umaasang kalaunan ay mawawala sa eksena itong si Bob Arum. Kapag nawala na siya, puwede nang matuloy,” dagdag niya.
Binigyan ni Pacquiao ang kampo ni Mayweather hanggang katapusan ng Enero para lagdaan ang kontrata para sa mega fight ngunit marami pa rin balakid para maikasa ito.
Sa panayam naman ni Lem Satterfield ng Ring Magazine, inamin ng adviser ni Pacman na si Michael Koncz na minamataan na nila ang Plan B sa katauhan ng boksingerong si Amir Khan.
“Naniniwala akong hindi papatol si Mayweather para labanan kami dahil wala naman siyang paki sa mga fans,” ani Koncz sa RingTV.com. “Hindi namin siya hihintayin. Isinara na namin ang pintuan, pero hindi talaga kami maghihintay, kaya tumitingin kami sa iba pang opsyon.
“Kasama rito si Amir. Nakausap ko na si Amir sa ilang okasyon, at nakausap na rin siya ni Golden Boy.”
Huling napalaban ang Pambansang Kamao noong Nobyembre ng nakaraang taon sa Macau, na matagumpay niyang naidepensa ang kanyang WBO welterweight title kontra kay Chris Algieri.
Matapos ang laban, lantarang hinamon ni Pacquiao si Mayweather sa paghayag na sang-ayon siya sa lahat ng termino sa kontrata at hinihintay lang niya na lagdaan ito ni Mayweather.
