HATAW! D'yaryo ng Bayan hatawtabloid.com
ni Ed de Leon
HINDI rin kami sanay na makitang ganoon si Kuya Germs, may sakit. Sanay kasi kaming nakikita siyang masiglang-masigla at walang tigil sa trabaho. Kahit na siyang mag-isa lang, dala niya ang kanyang mga damit, nag-iinterview siya sa mga artista para sa kanyang show. O kaya naman habang ang iba ay nakaupo lang at naghihintay sa pagdating ng mga artista, si Kuya Germs naman walang pahinga sa pag-check ng mga last minute details na kailangan para sa kanyang sinimulang Walk of Fame.
Roon din naman sa kanyang show, hindi lang siya host. Producer din siya at siyang nag-iintindi ng lahat mula sa mga talent fees hanggang sa mga kurtinang ginagamit sa set. Sa totoo lang dumarayo pa siya mismo sa Divisoria para bumili ng mga tela para sa mga kurtinang ginagamit sa kanilang set. Siya rin ang nagsasabi kung ano ang gagawin ng isa’t isa sa show, kaya siya rin in fact ang director niyon. Siya rin ang kadalasan ay nag-iimbita ng guests, alam naman ninyo si Kuya Germs, basta tumawag iyan kahit na walang talent fee mahirap hindian ng mga artista.
Bukod sa kanyang show, consultant pa rin siya sa maraming shows ng GMA 7. Kaya makikita mo rin siya kung minsan na nasa studio ng mga show na iyon, at minsan napupuyat din sa taping.
Kaya nga maski na siya mismo, nagrereklamo sa amin nang dalawin namin sa ospital na naiinip na siya dahil hindi siya sanay ng walang ginagawa. Pero pinaalalahanan nga namin siya na sinabihan na siya ng doctor na kailangan niyang magpahinga at iyong sobrang pagpapagod niya at stress, iyon na nga ang dahilan kung bakit siya nagkasakit.
Ang isa pang bagay, hindi lang iyong trabaho niya ang iniintindi ni Kuya Germs. Hindi lang ang career ng kanyang mga alaga sa kanyang shows. Pati na iyong mga hindi naman niya dapat iniintindi eh siya pa ang nagpapasan ng mga problema sa career.
Ewan nga ba, pero sana ngayong may sakit pa siya, lubayan na muna nila si Kuya Germs.
