500 deboto nilunasan ng MMDA

MAHIGIT 500 deboto ng Black Nazarene ang natugunan ng first aid station ng Metro Manila Development Authority (MMDA).

Sinabi ni Eduardo Gonzales, head ng Road Emergency Group First Aid Station ng MMDA sa Quirino Grandstand, iba’t ibang kaso ang kanilang tinugunan karamiha’y nahirapang huminga, nahilo, tumaas ang presyon ng dugo at may ilan ding natuklapan ng kuko at bahagyang napilayan.

Lahat aniya ay nagpahinga lang sa first aid station bukod sa isang epileptic patient na inatake at kinailangang isugod sa Manila Doctors Hospital.

Mahigit 100 rescue personnel ng MMDA ang nakatalaga sa Quirino Grandstand.

Dinaanan ng traslasyon agad nilinis ng MMDA

AGAD nilinis ng mga tauhan ng Metro Manila Development Authority (MMDA) ang mga lugar na dinaanan ng traslasyon ng Black Nazarene.

Pagkaalis ng mga deboto sa Quirino Grandstand na dumagsa roon, agad naghakot ng basura ang mga streetsweeper karamiha’y pinagkainang styro, bottled water, mga hinigaang karton at mga tsinelas.

Bitbit ng mga streetsweeper ang walis, dustpan at kariton na nilalagyan nila ng basura.

May nakasunod na rin silang trak ng basura na naghakot ng mga naipong basura ng streetsweepers.