HATAW! D'yaryo ng Bayan hatawtabloid.com
ni James Ty III
NAKITA naming nanonood ng laro ng PBA sa Araneta Coliseum noong Linggo ang sexy actress ng TV5 na si Ritz Azul. Kaugalian na ni Ritz na manood ng basketball dahil ang TV5 ay opisyal na estasyon na kumokober ng PBA.
Sa aming pakikipag-usap kay Ritz, kinompirma niya na magiging bida siya sa isang bagong sitcom sa Kapatid Network kasama ang tatlong players na sina Gary David, Beau Belga, at Willie Miller.
Kilala si Gary noon bilang nanalo sa dance contest na Celebrity Dance Battle na dating napapanood sa TV5.
“’No Harm No Foul’ ang title ng bago kong show,” say ni Ritz sa amin. ”Excited ako kasi marami akong nakilalang mga player at nag-e-enjoy akong manood ng PBA.”
Si Ritz ay isa sa mga muse na pumarada sa opening ng PBA noong Oktubre.
Ang No Harm No Foul ay isa sa mga bagong show na ilulunsad ng TV5 sa susunod na taon.
Magkakaroon din ng bagong morning show ang misis ni Manny Pacquiao na si Jinkee kasama ang ilang mga asawa ng mga sikat na PBA players.
