HATAW! D'yaryo ng Bayan hatawtabloid.com
TULOG ang isang 62-anyos lolo makaraan suntukin ng isang lalaki habang papunta sa isang sulok upang umihi kamakalawa ng umaga sa Malabon City.
Patuloy na inoobserbahan sa Jose Reyes Memorial Medical Center at hindi pa rin nagigising ang biktimang si Nicanor Salvacion, ice vendor, ng 10 Taganahan St., Brgy. North Bay Boulevard South, Navotas City, sanhi ng pagkabagok ng ulo.
Habang pinaghahanap ang suspek na isang alyas Jaypee, mabilis na tumakas makaraan ang insidente.
Batay sa ulat ng pulisya, dakong 11 a.m. nang maganap ang insidente sa loob ng Malabon Market sa F. Sevilla Boulevard, Brgy. Tañong ng nasabing lungsod.
Nakikipag-inoman ang biktima sa kanyang mga kasamahan sa loob ng palengke ngunit tumayo at nagpunta sa isang sulok upang umihi.
Sa hindi nabatid na dahilan, bigla na lamang siyang sinuntok ng suspek kaya bumagsak siya at tumama ang ulo sa semento.
Pagkaraan ay hindi na nagising ang biktima kaya mabilis na isinugod sa pagamutan ng kanyang mga kainoman.
Inaalam pa ng pulisya kung ano ang motibo ng suspek sa pagsuntok sa biktima.
Rommel Sales
