Bus sumalpok sa jeep, 12 sugatan

SUGATAN ang 12 katao kabilang ang isang kritikal ang kalagayan makaraan sumalpok ang isang bus sa pampasaherong jeep sa loading bay ng Quezon Avenue – Fisher Mall sa Quezon City.

Ayon sa driver ng pampasaherong jeep na si Feliciano Ramos, paalis na siya sa loading bay makaraan magbaba at magsakay ng pasahero nang bumangga sa likuran ng kanyang minamaneho ang pampasaherong bus ng Universal Guiding Star dakong 8 a.m. kahapon.

Habang depensa ng bus driver na si Antonio Mercado, hindi kumakapit ang preno ng kanyang sasakyan kaya nagdesisyon siyang idaan ito sa gutter sa gilid ng footbridge para mabawasan ang impact.

Ngunit may isang babae na kabababa lang ng footbridge at hindi napansin ang parating na bus dahil nagte-text.

Bago bumangga sa jeep, nahagip ng bus ang naturang babae at pumailalim sa bus ang biktima.

Bukod sa naturang biktima na kritikal ang kondisyon, may apat pang pasahero ng jeep ang nagkaroon ng mga galos habang pitong pasahero ng bus ang nasaktan sa aksidente.

Iniimbestigahan ng Quezon City Traffic Sector 1 ang insidente habang tiniyak ng may-ari ng bus company na handa silang managot sa nangyari.