Purisima suspendido

IPINASUSUSPINDE ng Office of the Ombudsman si Philippine National Police (PNP) Director General Alan Purisima.

Iniutos ni Ombudsman Conchita Carpio-Morales ang anim buwan preventive suspension without pay laban sa PNP chief dahil sa pag-apruba sa sinasabing maanomalyang kontrata sa WERFAST Documentary Agency noong 2011.

Bukod kay Purisima, ipinasususpinde rin ng Ombudsman si Police Director Gil Meneses, dating hepe ng Civil Security Group (CSG); at iba pang mga opisyal ng PNP-Firearms Explosive Office (FEO) kabilang sina Chief Supt. Raul Petrasanta, Chief Supt. Napoleon Estilles, Senior Supt. Allan Parreno, Senior Supt. Eduardo Acierto, Senior Supt. Melchor Reyes, Supt. Lenbell Fabia, at iba pa.

Ipinadala na ang kautusan kay Interior and Local Government Secretary Mar Roxas.

Almar Danguilan

Suspensiyon vs Purisima ipatutupad

TINIYAK ng Malacanang na ipatutupad ang ipinataw na 6 months preventive suspension laban kay PNP chief Allan Purisima kaugnay sa isinampang P100-M plunder case sa Office of the Ombudsman.

Sinabi ni Communications Secretary Herminio Coloma Jr., ipatutupad ni DILG Sec. Mar Roxas ang 6 months preventive suspension laban kay Purisima kaugnay ng maanomalyang Werfast deal na pinasok ng PNP.

Ang P100-M plunder case na isinampa ni Glenn Gerard Ricafranca laban kay Purisima sa Ombudsman noong Abril 2014 ay nag-ugat sa maanomalyang kontratang pinasok ng PNP sa Werfast courier agency na magde-deliver nang door-do-door ng firearm license sa gun owners.

Rose Novenario