2 sundalo dinukot ng NPA sa ComVal

DINUKOT ng hinihinalang mga miyembro ng New People’s Army (NPA) ang dalawang sundalong nagbabantay sa isang plantasyon sa Brgy. San Roque, New Correll, Compostela Valley kamakalawa.

Ayon kay Major Gen. Eduardo Año, kompirmadong mga miyembro ng 60th Infantry Battalion ng Philippine Army ang hindi pinangalanang mga sundalo.

Sa imbestigasyon, nagbabantay ang dalawa sa airstrip ng kompanyang Sumifru nang biglang tutukan ng baril ng 15 NPA.

Hindi na nakalaban at isinuko na lamang ng dalawa ang kanilang mga armas sa mga rebelde na nagkunwaring mga empleyado at nakasuot ng uniporme ng Sumifru.

Nagsasagawa na ng operasyon ang AFP para mailigtas ang mga sundalo.