HATAW! D'yaryo ng Bayan hatawtabloid.com
SUGATAN ang limang mag-aaral kabilang ang anak ng aktor na si Dennis Trillo, at tatlong iba pa makaraan magsalpokan ang dalawang school service kahapon sa Quezon City.
Ayon kay Traffic Enforcer Jeffrey Dizon ng Quezon City District Traffic Enforcement Unit Traffic Sector 1, naganap ang insidente dakong 5:45 a.m. sa N. Roxas St., kanto ng Speaker Perez St., Brgy. Lourdes ng lungsod.
Minamaneho ni Rasmor Padios ang Kia Pregio (TWT-945), school service ng Xavier School, sa nasabing lugar para ihatid ang mga bata sa eskwelahan nang sumalpok sa Isuzu canter (TXF-527) na minamaneho ni Jerry Lito Papa, school service ng Malayan High School of Science ng Pandacan, Maynila.
Limang estudyante ang kompirmadong nasugatan, kabilang ang anak ng aktor.
Bukod sa mga estudyante, may nasugatan din ang dalawang driver at isang konduktor.
Samantala, nagtuturuan ang dalawang driver kung sino sa kanila ang may kasalanan sa insidente.
Jethro Sino Cruz
