P7.1-M budget sa Indonesian trip ni PNoy

NAGLAAN ang Palasyo ng P7.1 milyon para sa isang araw na partisipasyon ni Pangulong Benigno Aquino III sa 7th Bali Democracy Forum.

Ang naturang halaga ay para pantustos sa transportasyon, accommodation, pagkain, equipment at iba pang gastusin ng Pangulo at ng kanyang 47-member delegation na umalis kahapon patungong Bali, Indonesia.

Si Pangulong Aquino ang co-chairman ng 7th Bali Democracy Forum na may temang “Evolving Regional Democratic Architecture: The Challenges of Political Development, Public Participation and Socio-Economic Progress in the 21st Century,” na inaasahang dadaluhan ng world leaders.

Ibabahagi ng Punong Ehekutibo ang mayamang karanasan ng Filipinas sa pagkamit ng demokrasya at bilang anak ng democracy icons na sina dating Sen. Ninoy Aquino at dating Pangulong Cory Aquino, ang Pangulo ay magsisilbing inspirasyon sa mga lider ng iba’t ibang bansa na makahahalubilo niya, ayon kay Executive Secretary PaquitoOchoa.

“Pagkakalooban si Pangulong Aquino ni Indonesian President Susilo Bambang Yudhoyano ng “Bintang Republik Indonesia Adiourna o Star of the Republic of Indonesia, ang pinakamataas na parangal ng Jakarta government sa isang indibidwal na nag-ambag ng kakaibang serbisyo para sa “integrity, viability and greatness of Indonesia,” ani Ochoa.

(ROSE NOVENARIO)