Altamirano: Hindi kami pressured sa Ateneo

KAHIT dalawang beses na kailangang talunin ng National University ang Ateneo de Manila sa Final Four ng seniors basketball ng UAAP Season 77 ay hindi natitinag ang head coach ng Bulldogs na si Eric Altamirano.

Tinalo ng Bulldogs ang Eagles, 78-74, noong Huwebes upang maipuwersa ang rubber match na gagawin sa susunod na Miyerkules sa Smart Araneta Coliseum.

Matatandaan na naging top seed ang NU sa Final Four noong isang taon ngunit dalawang beses silang natalo sa University of Santo Tomas.

Nanguna sa panalo ng NU si Jay-Jay Alejandro na nagtala ng 20 puntos samantalang anim na sunod na free throw ang naisalpak ni Gelo Alolino upang maagaw ng Bulldogs ang kalamangan pagkatapos na nanguna pa ang Eagles, 72-71, 1:30 ang nalalabi dahil sa tres ni Nico Elorde.

Kung muling mananalo ang NU sa Miyerkules ay papasok sila sa UAAP finals sa kaunaunahang pagkakataon mula noong naging kampeon ito sa liga noon pang 1954.

(James Ty III)