Magsanoc ititimon ang Hapee Toothpaste

TINANGGAP na ng dating PBA superstar na si Ronnie Magsanoc ang trabaho bilang head coach ng Hapee Toothpaste sa PBA D League.

Si Magsanoc ay dating head coach ng San Beda College sa NCAA at assistant coach siya ngayon ng Ateneo Blue Eagles sa UAAP at Meralco Bolts sa PBA.

Ang Hapee ay papalit sa North Luzon Expressway na nakapasok na bilang expansion team sa PBA.

Nagbabalik ang Hapee sa basketball sa pamamagitan ng pagsali nito sa D League pagkatapos ng ilang taong pamamahinga mula noong umatras ito sa Philippine Basketball League.

Ilan sa mga manlalaro ng Hapee ay manggagaling sa San Beda sa pangunguna nina Ola Adeogun, Art de la Cruz at Baser Amer.

Bukod dito, kasama rin sa lineup ng Hapee sina Garvo Lanete at Kirk Long.

Ang pagsali ng Hapee sa D League ay magiging unang hakbang tungo sa pagpasok nito sa PBA bilang expansion team sa susunod na taon.

(James Ty III)