Lola todas, 3 apo grabe (Bahay inararo ng trak)

TODAS ang isang 53-anyos lola habang sugatan ang tatlong paslit na apo nang suyurin ng rumaragasang trak ang kanilang bahay sa Tondo, Maynila, iniulat kahapon.

Ayon sa Manila Police District –Traffic Enforcement Unit (MPD-TEU), isinugod sa Gat. Andres Medical Hospital ang mga biktimang sina Prince Go, 3; Janica Timcang, 1; at Althea Timcang, 2 buwan gulang, pawang residente ng Radial Road 10, Tondo, Maynila.

Dead-on-arrival sa Mary Johnston Hospital ang lolang si Lydia Yumul.

Sa ulat ni SPO1 Gene Reyes, ng MPD-TEU, dakong 5:00 p.m. nang mangyari ang insidente sa Radial Road 10.

Minamaneho ng suspek na si Ricardo Balandra, 53, ng Blk. 7, BLC Rawis, Tondo, Maynila ang trailer truck, may plakang TXL-254, pag-aari ng MGCM Trucking Service, nang mawalan ng control, dumeretso sa bahay ng mga biktima.

Nahaharap sa kasong reckless imprudence resulting to homicide at serious physical injury ang driver.

(LEONARD BASILIO)