HATAW! D'yaryo ng Bayan hatawtabloid.com
NANAWAGAN si Caloocan City Mayor Oscar “Oca” Malapitan sa mga residente na sumali sa magkasunod na Mega Job Fair na gaganapin kung saan prayoridad ang mga skilled workers sa mahigit sa isandaang kompanyang kalahok.
Ayon kay Malapitan, pagkakataon na ito ng kanyang mga kababayan lalo na ang mga may karanasan sa manufacturing, health care, direct company at recruitment agency na makakuha ng maayos at magandang trabaho.
Gaganapin ang Mega Job Fair sa Setyembre 10 sa Caloocan City Hall South; at sa Setyembre 18 sa Caloocan City Hall North mula 8:00 ng umaga hanggang 5:00 ng hapon. “Hinihikayat po natin ang lahat ng jobseeker na sumali sa mga mega job fair natin, lalo na ang mga may skill at kinalaman sa engineering, programming, marketing and sales, at information technology, etc.” ani Mayor Malapitan.
Aabot sa mahigit 4,000 trabaho dito at sa labas ng bansa ang tinatayang makukuha ng mga karapat-dapat sa naturang event.
“Trabaho at Kabuhayan para sa Maunlad na Caloocan” na tema ay kaugnay ng isinusulong ni Mayor Malapitan na employment at lifetime career para sa lahat ng residente ng lungsod.
Pinayuhan din ang mga maghahanap ng trabaho na magdala ng mas maraming resume upang mas lumaki ang kanilang tsansa na matanggap.
May mga job counsellor din mula sa pamahalaang lungsod na handang tumulong sa mga aplikante at mapayuhan sila kung ano ang nararapat na trabaho para sa kanila.
(rommel sales)
