Nora, nainip kaya iniwan ang presscon ng Trenderas?

ISANG bagong programa na naman ang matutunghayan ngayong Sabado (Setyembre 13) 9:00 p.m., sa TV5, ito ay ang Trenderas, isang musical-drama comedy serye na pagbibidahan nina Isabelle de Leon, Katrina ‘Suklay Diva’ Velarde, at Lara Maigue.

Kasama sa seryeng ito ang nag-iisang Superstar na si Nora Aunor sa kanyang natatanging pagganap bilang si Celestina Cruz, isang sikat na mang-aawit na huhubog at magiging inspirasyon ng tatlong “Trenderas” girls.

Ginanap ang presscon ng Trenderas noong Martes ng gabi sa TV5 Reliance Center. Pero bago naganap ang presscon may nangyari na palang hindi maganda.

Ayon sa tsika, dumating ng 4:00 p.m. si Ate Guy sa naturang venue. Ang call time ng presscon ay 6:00 p.m.. Natural, maaga si Ate Guy ng dalawang oras para sa presscon proper na tama lamang daw para sa mga artistang tulad niya dahil aayusan pa raw sila. Pero ang siste, nainip yata si Ate Guy kaya bigla itong nag-walk-out o umalis at iniwan ang presscon nang makitang wala pang press people.

Kaya naman nang presscon proper na at nang tanungin namin kung nasaan si Ate Guy, biglang napasimangot ang aming kausap na tila ba na-badtrip sa biglang pag-eskapo ni Ate Guy.

Hindi lang malinaw sa amin kung alam ni Ate Guy na 6:00 p.m. talaga ang presscon.

ni Maricris Valdez Nicasio