Arellano sososyo sa liderato

SISIKAPIN ng Arellano Chiefs na makaulit kontra Perpetual Help Altas upang muling makisosyo sa liderato ng 90th NCAA men’s basketball tournament.

Makakasagupa ng Chiefs ang Altas sa ganap na 2 pm sa The Arena sa San Juan.

Ito’y susundan ng salpukan ng Jose Rizal Heavy Bombers at Lyceum Pirates sa ganap na 4 pm.

Ang Arellano University ay may record na 9-2 at nasa ikalawang puwesto sa likod ng defending champion San Beda Red Lions (10-2). Tabla naman sa ikatlong puwesto ang Perpetual Help at Jose Rizal sa kartang 7-4.  Ang Lyceum ay nasa ikaanim na puwesto sa kartang 5-6.

Sa kanilang unang pagkikita noong Hulyo 26 ay dinaig ng Chiefs ang Altas, 97-85.  Sa larong iyon, ang Chiefs ay pinamunuan ni Keith Agovida na gumawa ng 22 puntos.

Bukod kay Agovida, umaasa si Arellano coach Jerry Codinera kina Dioncee Holts, Levi Hernandez, Jiovani Jalalon at pro-bound na sina John Pinto at Prince Caperal.

Ang Perpetual Help Altas na iginigiya ni coach Aric del Rosario ay mayroon ding dalawang manlalarong napili sa nakaraang PBA Rookie Draft sa katauhan nina Juneric Baloria ay Harold Arboleda. (SABRINA PASCUA)