Parak durog sa truck

HALOS madurog ang katawan ng isang tauhan ng Parañaque police nang masagasaan at magulungan ng truck habang sakay ng motorsiklo kahapon ng umaga sa San Mateo, Rizal.

Sa ulat na tinanggap ni S/Supt. Bernabe Balba, Rizal PNP Provincial Director, kinilala ang biktimang si PO3 Rolindo Ondagan, nasa hustong gulang, nakatalaga sa Parañaque PNP, at nakatira sa bayan ng San Mateo.

Habang arestado ang driver ng truck na si Ramil delos Reyes, 31, nakatira sa #16 Gravelpit, Guinayang, ng nabanggit na bayan.

Sa inisyal na imbestigasyon ng pulisya, dakong 9 a.m. sakay ang biktima ng kanyang motorsiklo mula sa bahay at papasok sa duty nang mawalan ng preno at pumasok sa ilalim ng truck (XCZ-452) na minamaneho ni Delos Reyes.

Pagkaraan ay nagulungan ang biktima ng truck at nagmistulang napitpit na lata na agad niyang ikinamatay.

Nakapiit na ang suspek sa himpilan ng pulisya habang inihahanda ang kasong reckless imprudence resulting in homicide na isasampa sa kanya. (ED MORENO)