Kidnapper arestado sa rescue operation (Anak ng bank manager dinukot)

ARESTADO sa mga tauhan ng Manila Police District (MPD) kamakalawa ng gabi ang isang lalaki na dumukot sa anak ng isang bank manager sa Ermita, Malate, Maynila.

Kinilala ni PO3 Rodel Benitez ng MPD General Assignment Section ang suspek na si Arturo Kalaw, Jr., ng Brgy. Gonzales, Tanauan City, Batangas.

Napag-alaman, dinukot ng suspek ang biktimang si Jenna Mae Trinidad Cariaga, 29, nanunuluyan sa Grand Tower 2 Condominium, P. Ocampo St., Ermita, Malate, Maynila, noong Hunyo 9 sa Tanauan City.

Humingi ang suspek ng P2 milyon sa ama ng biktima na si Armando Cariaga, bank manager, ng Tanauan City, Batangas, at naninirahan din sa Grand Tower Condominium.

Kamakalawa, tumawag ang suspek sa ama at sinabing hawak niya ang biktima. Ipinarinig pa ng suspek sa ama ang boses ng biktima sa cellphone.

Nagkasundo ang dalawa na ihahatid ng suspek ang biktima sa kanilang condominium kapalit ng P2 milyon ransom ngunit humingi ng tulong ang ama sa mga awtoridad.

Dakong 8 p.m. nasakote ng mga awtoridad ang suspek sa elevator  ng condo at nasagip ang biktima.

(LEONARD BASILIO)