P2-B ‘kickback return’ offer ‘di kinagat ni PNoy (Kaya laban bawi si Napoles)

HINDI kinagat ni Pangulong Benigno Aquino III ang pahiwatig ng kampo ni Janet Lim-Napoles na magsauli ng P2 billion kickback sa pork barrel scam para mabigyan ng immunity.

Sinabi ni Pangulong Aquino, sa kanyang huling narinig sa balita, nagkokontrahan ang dalawang abogado ni Napoles sa kickback return offer. Ayon kay Pangulong Aquino, nagtataka rin siya sa alok ni Napoles gayong kamakailan ay sinabing walang pambayad ng hospital bills. Hayaan na lamang aniya sa Department of Justice (DoJ) ang isyu at timbangin ang sinasabi ni Napoles.

“Number one, pagkaintindi nasa news kagabi raw yata ‘yan. Number two, dalawang abogado na supposedly nagre-represent sa kanya ang nagkokontrahan kung ano talaga ang alok. Number three, ‘yung last na sinabi sa akin sa finances – o narinig ko – sa finances ni Mrs. Napoles, noong nasa Ospital ng Makati siya, inaangkin niya na wala siyang pondo pambayad doon sa ospital. Pero ngayon meron siyang ibibigay sa gobyerno?” ani Pangulong Aquino.

Bago ito, lumutang ang pahayag ni Atty. Stephen David, isa sa mga abogado ni Napoles, tiningnan nila ang listahan ni Napoles at natuklasang P200 million hanggang P300 million lamang ang maisasauli ng kanyang kliyente.