HATAW! D'yaryo ng Bayan hatawtabloid.com
NANGHILAKBOT ang mga taong nakasaksi nang biglang tagpasin ng isang mister ang ulo ng isang lalaki na pinaghihinalaan niyang kalaguyo ng kanyang misis sa isang tindahan sa Sapang Palay, San Jose del Monte City, Bulacan kamakalawa.
Kinilala ng pulisya ang biktimang si Ronell Patangan, residente sa Magra Road, Brgy. Bagong Buhay, sa nasabing lugar.
Ayon kay PO3 Christian Atendido, may hawak ng kaso, pinatay ng suspek na si Jun Diaz sa Sampol Market, ang biktima dahil sa tsismis na may relasyon sa kanyang misis.
Nabatid na dahil sa nasabing tsismis ay iniwasan ng biktima na magpanagpo ang landas nila ng suspek na nagbantang kapag nag-krus ang kanilang landas ay may masamang mangyayari.
Sa hindi inaasahang pagkakataon, habang naglalaro ng video games ang biktima sa isang tindahan sa Brgy. Bagong Buhay, sa naturang siyudad, naispatan siya ng suspek.
Naging abala ang biktima sa paglalaro kaya hindi napansin ang papalapit na suspek na noon ay kargado ng matalas na patalim sa baywang
Sa harap ng nagulantang na mga tao, biglang inilabas ng suspek ang dala-dalang armas at walang pakundangang tinagpas sa leeg ng biktima hanggang mapugot ang ulo.
Kasalukuyang tinutugis ng pulisya ang nasabing suspek.
(MICKA BAUTISTA/DAISY MEDINA)
