FEU ECE stude patay sa tarak
PATAY ang isang 20-anyos college student nang pagsasaksakin ng isa sa dalawang suspek sa Sampaloc, Maynila, iniulat kahapon.
Kinilala ang biktimang si Jacinto Noel Genuino, kumukuha ng kursong Electronic Communications Engineering sa Far Eastern University (FEU).
Sa inisyal na imbestigasyon ng Crime Against Person Section ng Manila Police District (MPD), naglalakad sa lugar ang biktima kasama ang isang kaibigan nang makasalubong sa kanto ng Don Quijote at España Boulevard ang mga suspek na sina Greg Dan Balais, 21, dating estudyante ng FEU; at Eric Rivera, 20, estudyante ng University of Santo Tomas (UST).
Ayon sa ulat, sa hindi malamang dahilan, habang nagpapambuno ang tatlo, biglang tumimbuwang si Genuino nang saksakin ni Balais.
Malalim na saksak sa tadyang at likuran ang inabot ng biktima na naisugod pa sa UST Hospital pero namatay rin habang nilalapatan ng lunas ng mga doctor.
Isinusulat ito, nakatakdang sampahan ng kaso sa Manila Prosecutor’s Office ang dalawang suspek.
(LEONARD BASILIO)
