HATAW! D'yaryo ng Bayan hatawtabloid.com
INOOBSERBAHAN sa pagamutan ang tatlong menor de edad makaraan ratratin ng kapwa nila teenager kahapon ng madaling-araw sa Masbate City.
Kinilala ang mga biktimang nilalapatan ng lunas sa Masbate District Hospital na sina Ryan Lao-ang, 17; Sonny Tioco, 16, kapwa taga Brgy. Kinamaligan, at Jaylord Gonzaga, 17, ng Brgy. Bolo sa nabanggit na siyudad.
Habang pinipigil sa Masbate City PNP ang suspek na itinago sa pangalang Kim, 16, residente ng Brgy. Kinamaligan sa naturang lungsod.
Sa ulat ng pulisya, naganap ang insidente dakong 2 a.m. habang pauwi na ang tatlong biktima galing sa sayawan sa Brgy. Bolo.
Nauna rito, nagkaroon nang mainitang pagtatalo ang suspek at ang mga biktima sa nasabing sayawan hanggang sa umalis ang tatlo.
Lingid sa kaalaman ng mga biktima, inabangan sila ng suspek na armado ng baril at sila ay pinaputukan.
Tumakas ang suspek makaraan ang pamamaril ngunit isinuko siya ng kanyang mga magulang.
(JETHRO SINOCRUZ)
