Bangkaroteng motel ginamit na drug, prosti den

DALAWA  katao  ang  arestado matapos mahulihan ng ipinagbabawal na droga sa sinasabing pugad ng prostitusyon na motel, sa isinagawang raid ng mga awtoridad sa Caloocan City, kamaka-lawa ng gabi.

Kinilala ang mga suspek na sina Noel Fernandez, ng 3rd Avenue, BMBA, Brgy. 118 ng lungsod at isang Jerome Octubre, nasa hustong gulang, ng Brgy. Maysan, Valenzuela City, na umano’y mga suki ng Venus Hotel, kapwa nakuhanan ng shabu at drug paraphernalia.

Isinagawa ang raid dahil sa mga sumbong na umano’y pugad ng prostitusyon at bentahan ng droga ang nasabing hotel, nasa kanto ng 2nd Avenue at Rizal Avenue Extension, ng lungsod.

Pinagpapaliwanag ang may-ari ng hotel na sina Wilson at Bong Woo, tungkol sa sumbong na ginagamit ang hotel bilang bagsakan at gamitan ng ipinagbabawal na droga.

Natuklasang matagal nang paso ang business permit ng nasabing hotel kaya agad itong ipinasara ng pamahalaang lungsod.

(rommel sales)