HATAW! D'yaryo ng Bayan hatawtabloid.com
ISANG opisyal ng FIBA Asia ang nagpasaring sa Philippine Basketball Association tungkol sa hindi pag-aksyon tungkol sa paghahanda ng Gilas Pilipinas para sa FIBA World Cup sa Espanya sa Agosto ng taong ito.
Ayon kay Magesh Mageshwaran na nagsisilibing Head of Communications ng FIBA Asia, dapat ay kanselahin na lang ng PBA ang Governors’ Cup para may sapat na panahon ang tropa ni coach Chot Reyes na maghanda para sa World Cup.
Sa ngayon ay nakatali ang kamay ni Reyes dahil kung matutuloy ang PBA third conference, maiksi lang ang paghahanda ng Gilas dulot ng kulang sa mga tune-up na laro kumpara sa ibang mga bansa na naghahanda na nang matagal tulad ng Iran .
“The third and final conference of the PBA, the Governor’s Cup, can be – and in my opinion should be – put off in support of the national team,” pahayag ni G. Magesh. “No league can survive or retain its credibility by denying the national team the time and space to prepare for an event as big as the World Cup. And any fan – including all those who steadfastly follow the PBA proceedings – would want their favorite players to don the national colors, given a choice.”
Makikipagpulong ang PBA board of governors kay Reyes sa Enero 30 para ayusin ang problema tungkol sa national team.
Samantala, iginiit ni PBA commissioner Chito Salud ang pagtatag ng national pool na kinabibilangan ng mga manlalaro ng liga para sa mga susunod na national teams.
May panukala sa PBA board na payagan ang liga na huwag paglaruin ang mga bata ni Reyes sa Governor’s Cup para maging mahaba ang paghahanda ng Gilas.
Bukod kasi sa FIBA World Cup, sasabak din ang Gilas sa Asian Games sa Incheon, Korea, sa Oktubre.
“We understand the plan is for Gilas to stay together in Spain and play games with other teams as a warm-up for the Asian Games,” ani Salud. “If that’s the case, it will be a long time away from home and family for the players. I don’t know if there will be time for the players to go home from Spain before proceeding to Incheon.”
Ni JAMES TY III
