Mommy D sinisingil ng P10-M ng BIR

BINATIKOS ng ina ni Manny Pacquiao na si Mrs. Dionesia Pacquiao ang BIR dahil sa aniya’y panggigipit sa kanyang anak at maging siya ay hinahabol na rin.

Ibinulgar ni Mommy D na sinulatan din siya ng BIR at pinagbabayad dahil sa kinita niya sa TV commercial at pelikula.

Kwento ng tinagurang “Pacmom,” minsan ay may nagtungo sa kanilang bahay na kawani ng BIR ngunit ipinagtabuyan niya.

Sa kanyang pagkakaalam, nasa P10 million ang sinisingil sa kanya na mas malaki pa sa kanyang kinita.

Inamin ni Mommy Dionesia na sa ginawang pelikula niya kasama ang beteranang actress at comedy queen na si Ai Ai delas Alas ay umaabot sa P600,000 ang kanyang talent fee ngunit ang kanyang natanggap ay P400,000 na lamang dahil sa siningil na buwis ng BIR.

Sa ngayon, tatlong taon na aniyang wala siyang commercial at shooting sa pelikula kaya wala siyang kita ngunit bakit hinahabol pa rin siya ng BIR.

Dagdag ni Mommy D, mula sa dugo at pawis ni Manny ang kanyang kinita ay kung bakit ginigipit pa.