P50-M heavy equipments sinilaban sa Zambo Norte

ZAMBOANGA CITY – Umaabot sa mahigit P50 milyong halaga ng mga heavy equipment ang sinilaban ng armadong grupo sa isang construction site ng Department of Public Works and Highways (DPWH) sa Sitio Gutay, Brgy. Titik, Sindangan, Zamboanga del Norte.

Napag-alaman ng Sindangan municipal police station mula kina Engr. Cris Rodrigo Cuizon ng ESR Construction Supply, at Engr. Arnold Mocorro Mantiza ng DPWH, dakong 4 p.m. kamakalawa habang abala sila sa kanilang ginagawa sa construction site, nang lumitaw ang hindi bababa sa 20 armadong suspek kabilang ang apat kababaihan.

Tinutukan sila ng matataas na kalibre ng baril at inutusang ihinto ang kanilang trabaho.

Kasunod nito, binuhusan ng gasolina ang kanilang mga heavy equipment saka sinilaban.

Kabilang sa mga sinunog ng armadong grupo ang dalawang bulldozer, isang backhoe at isa pang military jeep.