HATAW! D'yaryo ng Bayan hatawtabloid.com
UMABOT sa ikatlong alarma bago tuluyang naapula ng mga bombero ang sunog na tumupok sa malaking bahagi ng lumang palengke ng Science City of Muñoz, lalawigan ng Nueva Ecija, nitong Linggo ng madaling araw, 28 Hunyo.
Sa ulat mula kay Fire Sr. Insp. Arnulfo Pol, Acting City Fire Marshal, dakong 2:00 ng madaling araw kamakalawa nang magsimula ang sunog sa nasabing palengke na nasa Brgy. Poblacion West, sa nabanggit na bayan.
Agad nagresponde ang mga bombero para apulahin ang naglalaglab na apoy na tumupok sa maraming puwesto na nag-iwan ng malaking pinsala at pagkalugi sa kabuhayan ng mga negosyante.
Dakong 6:40 ng umaga nang maapula ng BFP-Muñoz ang apoy sa tulong ng 10 fire stations mula sa mga kalapit-bayan at lungsod katuwang ang iba pang fire volunteer brigade.
Walang naitalang nasagutan o nasawi, habang patuloy na iniimbestigahan ang pinagmulan at sanhi ng sunog.
Nagpunta sa lugar si City Mayor Baby Armi Alvarez, kasama ang mga kawani ng city engineering office, barangay officials, lokal na pulisya at iba pang stakeholders para personal na masuri ang lawak ng pinsala at alamin ang kalagayan ng mga naapektohan.
Ayon kay Mayor Alvarez, patuloy ang koordinasyon ng mga kinauukulang ahensiya para sa mga agarang tugon sa insidente at ang pagbibigay ng kinakailangang suporta sa mga apektadong manininda sa nasunog na palengke ng Science City of Muñoz, Nueva Ecija. (MICKA BAUTISTA)
