Janeena Chan iwas na sa puyat at sobrang trabaho simula nang magka-Bell’s Palsy

SHOWBIZ KONEK
ni Maricris Valdez

MAS pinahahalagahan na ngayon ni Janeena Chan ang sarili at kalusugan kaysa trabaho.

Ito ang iginiit ng model, digital content creator, at Sparkle GMA Artist Center nang ipakilala siya kasama sina David Licauco, Fabio Ide, Ellen Frojd, at Teejay Marquez bilang newest endorser ng BlueWater Day Spa kamakailan na ginawa sa branch nito sa Eton Greenhills.

Naibahagi ni Janeena na nagkaroon siya ng Bell’s Palsy nang sobra-sobra ang ginagawang trabaho to the point na halos walang pahinga at madalas nagpupuyat. Edad 23 pa lamang siya noon.

Kaya naman nagsilbing wake-up call sa kanya nang magkaroon ang bell’s palsy.

Ang Bell’s palsy ay isang kondisyon na nagdudulot ng biglaang panghihina o paralisis sa mga kalamnan sa isang bahagi ng mukha, na kadalasang humahantong sa paglaylay o kahirapan sa paggalaw ng mga kalamnan sa mukha. Bagama’t iba-iba ang eksaktong dahilan nito, ang stress at kawalan ng pahinga ay maaaring magpalala sa pangkalahatang kahinaan ng isang tao.

“Kapag feeling ko mai-stress ako or feeling ko I’m getting more than I can commit to, parang huwag na lang,” ani Janeena na may 10 taon na ang nakararaan nang makipaglaban siya sa naturang karamdaman.

“Naka-10 years na pala. At the time, I was super busy, pero hindi ‘yung busy in a healthy way pala,” anang dalaga.

Sinabi ni Janeena na walang pinipiling edad ang Bell’s palsy.

“It can happen to anyone talaga. Kahit sino puwedeng ma-paralyze ang face just because of stress and not having enough sleep.”

Aminado ang Sparkle artist na binalewala niya ang mga sintomas nito tulad ng pagkibot ng mata at tila ringing sensation sa tenga.

Natakot si Janeena at sobra-sobra ang pag-aalala nang maranasan ang bell’s palsy.

“Naisip ko baka hindi na bumalik ‘yung face ko, baka tabingi na siya. ‘Yung mga nakikita natin minsan, na parang ngumingiwi,” sambit niya.

At ang agarang medikal na atensyon ay nakatulong kay Janeena para mabilis gumaling.

Sumailalim ito sa  kombinasyon ng paggamot tulad ng acupuncture, electric stimulation therapy, at facial exercises para mabilis mapanumbalik ang paggalaw.

Malaking bahagi rin ang therapy na nakukuha niya mula sa BlueWater Spa. Ang malumanay na masahe ay lubhang kapaki-pakinabang. Nakatutulong iyon na maiwasan ang paninigas ng kalamnan, pinapabuti ang sirkulasyon ng dugo, at nagtataguyod ng pagpapahinga sa panahon ng pagbawi ng nerve. Karaniwan itong sinasamahan ng mga pagsasanay sa mukha upang mapanatili ang pagiging malambot at paggalaw-galaw.

At siyempre, ang pinakamahalaga, ang pananampalataya sa Panginoon.

“Grabe ‘yung pag-pray ko. It was really a test for me. I prayed a lot talaga. Kasi, siyempre, mayroon pa akong mga deadline, may mga work pa akong nakalatag.

“Parang I told myself, dapat in one month gumaling na ako. Gumaling naman ng dahan-dahan,” kuwento pa ni Janeena.

Sinabi rin ni Janeena na kung hindi niya naagapan at binigyang lunas ang nangyari sa kanya, posibleng hindi siya agad nakabalik sa dati.

“Pahinga talaga. Kung noon pwede pa akong magpuyat, ngayon hindi na talaga,” sambit pa ng dalaga.

Kaya naman tamang-tama ang pagkakasama ni Janeena bilang ambassador ng BlueWater Day Spa. Sa isang industriya na naging karaniwan na ang mahabang araw ng shooting, maraming schedules, ang paglalaan ng oras para sa wellness ay tunay na mahalaga.

Kaya ganoon na lamang ang excitement ni Janeena nang  makasama nina David, Fabio, Ellen, at Teejay bilangnewest member ng BlueWater Day Spa family. Malaking tulong ito sa kanya sa panunumbalik ng kanyang wellness. 

Naaayon din kasi ito sa kanyang sariling adbokasiya para sa kabutihan at positibong pamumuhay. 

Naibahagi ng limang endorser ang pangangalaga sa sarili, kagalingan, at pagpapanatili ng balanse sa gitna ng abalang pamumuhay.

Si David ay nagmuni-muni sa kanyang matagal na relasyon sa BlueWater Day Spa, isang partnership na lumago kasabay ng kanyang karera sa paglipas ng mga taon.

Kilala sa pananatiling grounded sa kabila ng kanyang patuloy na tagumpay, ibinahagi ni David na ang pangangalaga sa kapakanan ng isang tao ay kasinghalaga ng pagkamit ng professional milestone.

Ibinahagi rin nina Fabio at Ellen ang tungkol sa papel na ginagampanan ng wellness sa kanilang buhay pamilya.

Sinabi ng celebrity couple kung paano naging de-kalidad na family bonding ang mga wellness experience nila sa pamamagitan ng pagtuturo sa sa mga bata ng kahalagahan ng balanse, pangangalaga sa sarili, at malusog na gawi sa murang edad pa lamang.

Para naman kay Teejay, na ang trabaho ay madalas sa iba’t ibang bansa, ang pagpapanatili ng pisikal at mental na kagalingan ay naging mahalaga sa pagsunod sa isang mabilis na pamumuhay.

Ibinahagi ng aktor at content creator kung paano nagbibigay-daan sa kanya ang paglalaan ng oras para mag-recharge na magpatuloy sa pagdadala ng positibong enerhiya sa online at offline.

Napuno ng tawanan ang mga pagbabahaging isinagawa ng mga endorser lalo sa mga interactive na laro kasama ang mga miyembro ng media.

Ang mga mapagkaibigang hamon ay nagbigay-sulyap sa mga celebrity sa labas ng kanilang karaniwang mga tungkulin sa screen, na lumilikha ng mga hindi malilimutang sandali sa buong kaganapan.

Naging daan din ang pagtitipon para ibahagi ang mga hinahanal na services sa BlueWater Day Spa tulad ng signature Chiang Mai Massage, ang restorative Thai Yoga Massage, at advanced 5D Laser Treatment.

Ayon sa BlueWater Day Spa President at CEO na si Mary Simisim, ang event ay idinisenyo para paalalahanan ang mga tao na ang wellness ay hindi dapat tingnan bilang isang paminsan-minsang indulhensiya kundi bilang isang mahalagang bahagi ng pang-araw-araw na 

buhay.

Sa pagpapatuloy ng araw, umaasa ang brand na ma-inspire ang mas maraming Filipino na unahin ang sarili, maghinay-hinay kapag kinakailangan, at maglaan ng oras para mag-recharge.

Ipinaaalala rin na minsan ang pinakamagandang bagay na magagawa sa sarili ay mag-pause, mag-recharge, at mag-unwind.

Sa loob ng dalawang dekada, ang BlueWater Day Spa ay nananatiling isa sa mga nangungunang wellness destination, na nag-o-offer ng malawak na range ng treatments na idinesenyo para tulungan ang mga bibisita sa kanila na  makamit ang relaxation, rejuvenation, at overall well-being.