HATAW! D'yaryo ng Bayan hatawtabloid.com
CAPAS, TARLAC – Sinamantala ng Fil-Am runner na si Yacine Guermali ang kanyang nag-iisang event noong Miyerkules ng umaga nang dominahin niya ang men’s 5,000-meter race upang buksan ang ICTSI Philippine Athletics Championships na inihandog ng Philippine Sports Commission sa New Clark City Athletic Stadium dito.
Sa kabila ng halos tatlong araw lamang na paghahanda matapos dumating sa Maynila mula sa Estados Unidos noong nakaraang Linggo, maagang umabante si Guermali at hindi na lumingon pa, patungo sa gintong medalya sa oras na 14 minuto at 15.34 segundo, upang mapanatili ang kanyang paghahari sa naturang event sa ikatlong sunod na taon.
Pumangalawa ang kanyang national teammate na si Sonny Wagdos sa oras na 14:45.59, habang pumangatlo si Alfrence Braza ng Spectrum Runners sa 14:58.06 sa paligsahang inorganisa ng Philippine Athletics at sinuportahan din ng CEL Logistics at United Asia Automotive Group.
Samantala, ang dating Southeast Asian Games long jump gold medalist na si Janry Ubas ay nagtala ng season-best na 7.61 metro sa kanyang unang talon upang mapanatili ang titulo sa ikapitong sunod na pagkakataon. Nakuha naman ng kanyang itinuturing na tagapagmana at kapwa miyembro ng pambansang koponan na si Francis Kent Jardin ang pilak matapos tumalon ng 7.41 metro sa kanyang huling pagtatangka.
Nagwagi rin si Sarah Dequinan, bronze medalist sa women’s heptathlon sa nakaraang 33rd Thailand Southeast Asian Games, sa women’s javelin throw matapos maihagis ang sibat sa layong 45.59 metro bago lumipat sa kanyang pangunahing event kalaunan.
Sa iba pang maagang final events, nagtala si Arianna Dawn Rabi ng Ilocos Norte ng 10.89 metro upang manalo sa women’s Under-18 shot put, habang si Anna Bianca Espenilla ng FEU ay nagwagi sa women’s Under-20 javelin throw matapos maihagis ang sibat sa layong 45.96 metro. Ang torneo ay sinuportahan din ng Pocari Sweat, Clark Water at Energya.
“Hindi ko talaga hinahabol ang rekord ko sa 5,000 metro, pero sa tingin ko ito ang isa sa pinakamaganda kong performance sa event mula noong 2024 kaya masaya ako,” sabi ni Guermali, na may hawak ng pambansang rekord na 13:33.43 na naitala niya sa Virginia Challenge sa Charlottesville, Virginia noong Abril 18.
Sa kabila ng maikling panahon ng pag-aadjust bago ang karera, sinabi niyang hindi siya nakaranas ng jet lag.
“Sa tingin ko mas magaling na akong mag-adjust sa paglalakbay at pakikipagkarera sa Asya dahil matagal na rin akong sumasali rito,” aniya.
Ang dating varsity standout ng Gonzaga University ay nagsabing pangunahing layunin niya ang paghahanda para sa 20th Aichi-Nagoya Asian Games sa Japan sa Setyembre, kung saan pinag-iisipan pa niya kung sasabak sa 5,000 metro o sa isa pa niyang paboritong event na 1,500 metro.
“Depende iyon sa magiging kondisyon ng katawan ko dahil mahusay din ako sa 1,500 metro. Magkahawig ang dalawang event pero napakalakas ng kompetisyon sa Asya,” ani Guermali. “Titingnan namin kung magpo-focus ako sa isa o sasali sa dalawang event.”
Si Ubas naman, na may hawak ng pambansang rekord na 8.08 metro sa long jump na naitala niya sa men’s decathlon ng 2023 Cambodia Southeast Asian Games, ay natuwa sa kanyang season-best performance.
“Nakuha ko yung season best sa first jump kaya masaya ako kasi naka-6.40 lang ako sa huling talon ko sa Singapore,” sabi ng Army Private First Class.
Itinuro rin niya si Jardin, na sumasali rin sa 100 at 200-meter sprints, bilang posibleng humalili sa kanya sa long jump.
“Ang sabi ko kay Jardin na siya na ang papalit sa akin. Yung speed niya mas mabilis sa akin. Talo pa ako nito sa training,” sabi ng tubong Villanueva, Misamis Oriental.
Si Jardin, 22-anyos at mula sa Calinog, Iloilo, ay nagsabing malaki ang naitulong ni Ubas bilang mentor.
“Noong 2023 na-encourage ako sa kanya kaya ang sinabi ko na pag-aaralan ko yung technique niya. Kaya ito ako ngayon,” ani Jardin, na nagtala rin ng personal best sa kanyang silver-medal finish sa long jump. (PSC/HNT)
