HATAW! D'yaryo ng Bayan hatawtabloid.com
INAASAHANG halos 1,000 atleta, kabilang ang ilan mula sa walong dayuhang bansa, ang sasabak sa ICTSI Philippine Athletic Championships na inihaharap ng Philippine Sports Commission (PSC) mula Hunyo 10 hanggang 14 sa New Clark Athletics Stadium sa Capas, Tarlac.
“Ang ICTSI Philippine Athletics Championship ay higit pa sa isang pangunahing tanghalan ng talento; ito ay mahalagang bahagi ng pag-unlad ng track and field sa Pilipinas,” ayon kay PATAFA President Terry Capistrano.
“Ang pagsasama-sama ng pinakamahusay na mga atleta ng bansa kasama ang mga internasyonal na kalahok sa isang world-class na pasilidad tulad ng New Clark City ay nagpapataas ng antas ng kompetisyon para sa lahat,” dagdag ni Capistrano.
Ayon kay PATAFA Secretary General Jasper Tanhueco, nakumpirma na ang paglahok ng mga atleta mula sa Chinese Taipei, Canada, Indonesia, Malaysia, Papua New Guinea, Singapore, Samoa, at Estados Unidos sa prestihiyosong trackfest na mas kilala bilang National Open, kung saan ang ICTSI Foundation ang pangunahing sponsor.
“Sa ngayon, mayroon na tayong 945 rehistradong atleta para sa kompetisyon at maaari pa itong umabot sa 1,000 kapag kumpleto na ang listahan,” sabi ni Tanhueco.
Ang South Korea ang may pinakamalaking delegasyon na binubuo ng 15 atleta, kabilang ang apat sa men’s Open division at isa sa women’s Open division, habang ang iba ay kalahok sa Under-18 at Under-20 categories.
Magpapadala naman ang Papua New Guinea ng 12 atleta, habang tig-10 naman ang Indonesia at Singapore sa torneo na co-presented ng Bases Conversion and Development Authority (BCDA) at New Clark City, dagdag pa ng opisyal ng PATAFA.
“Buong suporta ang ibinibigay ng PSC sa PATAFA at sa ICTSI Philippine Athletics Championship. Lubos din kaming nagpapasalamat kay BCDA President Joshua ‘Jake’ Bingcang sa pagtiyak na handa ang mga world-class na pasilidad para sa ating mga atleta,” ani PSC Chairman Patrick Gregorio.
“Ang pagdaraos ng isang event na ganito kalaki sa New Clark City ay naaayon sa aming layunin na maitaguyod ang bansa bilang pangunahing destinasyon para sa sports tourism. Kapag nagkakaisa ang mga ahensya ng gobyerno, pambansang sports associations, at mga pribadong katuwang, nakakalikha tayo ng isang mataas na antas na entablado kung saan maaaring umunlad at magbigay-inspirasyon sa bayan ang ating mga pambansang atleta,” dagdag ni Gregorio.
Sa panig ng lokal na kalahok, aabot sa 870 atleta, kabilang ang mga miyembro ng national pool at mga kinatawan ng iba’t ibang lokal na club, ang maglalaban para sa mga karangalan sa paligsahan na suportado ng CEL Logistics, Inc., United Asia Automotive Group, Inc., Pocari Sweat, at Masiv Sports.
Pangungunahan naman ng mga beterano ng Olympic Games na sina Kristina Knott at Lauren Hoffman ang mga overseas-based Filipino athletes na sasabak sa torneo. Kinatawan ni Knott ang bansa sa Tokyo Olympics, habang si Hoffman naman ay lumahok sa Paris Olympics.
Kabilang din sa mga kalahok sina Yacine Guermali, na nagwagi ng dalawang silver medal sa ika-33 Southeast Asian Games sa Thailand; Elijah Cole, bronze medalist sa pole vault; at Zion Corrales Nelson, bronze medalist sa women’s 200-meter event.
“Ang championship na ito ay nagbibigay ng mahalagang pagkakataon para sa ating mga elite athletes na higit pang mapahusay ang kanilang porma, habang nagbubukas din ito ng pinto para sa mga bagong talento mula sa grassroots level upang maipakita ang kanilang kakayahan sa mas malaking entablado,” ani Capistrano.
Ito na ang ikalawang sunod na taon na gaganapin ang ICTSI Philippine Athletics Championships sa World Athletics-certified NCC Athletics Stadium, na unang nagbukas para sa track and field events ng ika-30 Philippine SEA Games noong 2019.
Dahil sa world-class na pamantayan ng pasilidad, magsisilbi rin ang kompetisyon bilang qualifying event para sa 20th Asian Games, na nakatakdang idaos mula Setyembre 19 hanggang Oktubre 4 sa Aichi-Nagoya, Japan. (PSC/HNT)
