HATAW! D'yaryo ng Bayan hatawtabloid.com
SANTA ROSA, Laguna — Nasungkit ng Lithuanian duo na sina Monika Paulikiene at Aine Raupelyte ang kampeonato sa women’s division ng Volleyball World Beach Pro Tour Nuvali Challenge matapos durugin ang Americans na sina Alaina Chacon at Madelyn Anderson, 21-12, 21-11, sa harap ng masiglang crowd noong Linggo ng gabi sa Nuvali Sands Courts.
Pinangunahan ng 6-foot-6 na si Raupelyte ang opensiba sa net, lalo na sa second set kung saan mabilis na lumobo ang kalamangan ng Lithuania sa 18-8 matapos ang isang masuwerteng dig ni Paulikiene.
Tinangkang humabol ng Team USA nang paliitin nina Chacon at Anderson ang agwat sa 19-11, ngunit hindi na sila pinatawad pa ng Lithuanian pair. Isang attack point ni Paulikiene ang nagbigay ng championship point bago tinapos ni Raupelyte sa pamamagitan ng floating ball attack para maselyuhan ang kanilang unang titulo bilang magkapareha.
“Ginawa ko lang ang best ko at naging agresibo sa blocking,” ani Raupelyte matapos umukit ng 23 puntos mula sa 16 kills at pitong blocks.
Nag-ambag naman si Paulikiene ng 10 puntos mula sa walong spikes at dalawang aces, at hindi napigilang maluha matapos makuha ang kauna-unahang gold medal ng kanilang tambalan.
Ayon kay Raupelyte, malaking bagay ang kanilang samahan sa loob ng court.
“Maganda ang atmosphere namin at lagi kaming nagtutulungan,” dagdag niya.
Matapos mabigo sa kanilang unang dalawang finals sa Mexico at China, sa wakas ay nabasag din ng Lithuanian tandem ang sumpa at naiuwi ang gintong medalya.
Samantala, nanatiling mailap ang titulo kina Chacon at Anderson, na muling yumuko kontra Lithuania sa kanilang huling tatlong paghaharap.
Sa men’s division, nanaig naman ang Australian pair na sina Thomas Hodges at Ben Hood
matapos ang come-from-behind 14-21, 21-16, 15-8 panalo laban kina Adrian Heidrich at Yves Haussener ng Switzerland.
Matapos matalo sa first set, bumawi ang Australians sa matinding opensa sa second at deciding set. Maagang umabante sina Hodges at Hood sa 10-4 bago tuluyang kontrolin ang laban.
Isang malaking block ni Hodges ang nagdala sa kanila sa championship point bago tuluyang tinapos ni Hood sa isang malakas na palo.
“Kailangan lang naming manatiling kalmado at magtiwala sa isa’t isa,” sabi ni Hodges, na nagtala ng 23 puntos.
Nag-ambag naman si Hood ng 11 puntos para sa kanilang unang titulo sa torneo.
Sa women’s bronze medal match, nanaig sina Emi Van Driel at Mila Konink ng Netherlands laban kina Valentyna Davidova at Anhelina Khmil ng Ukraine, 22-20, 21-18.
Samantala, nasungkit nina Julian Friedli at Jonathan Jordan ang bronze sa men’s division matapos talunin ang Germans na sina Philipp Huster at Sven Winter, 18-21, 21-13, 15-13. (PNVF/HNT)
