HATAW! D'yaryo ng Bayan hatawtabloid.com
NADAKIP ang isang pulis na kabilang sa drug watchlist sa isinagawang isang buybust operation ng mga tauhan ng PRO3 PNP sa lungsod ng San Fernando, lalawigan ng Pampanga, nitong Martes, 12 Mayo.
Ang operasyon ay lalong nagpalakas sa pinaigting na kampanya ng organisasyon laban sa ilegal na droga at internal cleansing.
Sa ulat mula kay PRO3 Regional Director P/BGen. Jess Mendez, inaresto ang 28-anyos na suspek na may ranggong Patrolman dakong 11:49 ng umaga kamakalawa sa Purok 5, Brgy. San Jose, sa naturang lungsod.
Magkatuwang na isinagawa ang operasyon laban sa ilegal na droga ng Provincial Drug Enforcement Unit (PDEU) ng Pampanga Police Provincial Office bilang lead unit, kasama ang Provincial Intelligence Unit (PIU) at San Fernando CPS, sa pakikipagtulungan ng Philippine Drug Enforcement Agency Regional Office 3.
Nakumpiska ng mga awtoridad mula sa suspek ang humigit-kumulang 105 gramo ng hinihinalang shabu na tinatayang nagkakahalaga ng P714,000.
Ipinaalam sa suspek ang kaniyang mga karapatan sa konstitusyon at dinala sa tanggapan ng PDEU, kasama ang mga nakumpiskang ebidensya, para sa wastong dokumentasyon at disposisyon.
Inihahanda na ang mga kasong paglabag sa Section 5 at 11, Art. II ng RA 9165 o Comprehensive Dangerous Drugs Act of 2002 upang isampa sa hukuman laban sa suspek.
Binigyang-diin ni P/BGen. Mendez na ang matagumpay na operasyon ay nagpapakita ng matibay na pangako ng organisasyon sa panloob na paglilinis at pananagutan sa loob ng hanay ng pulisya. (MICKA BAUTISTA)
