Top 4 MWP ng Bulacan, arestado ng DRT PNP

NAARESTO ng pinagsanib na puwersa ng pulisya ang isang most wanted person sa antas panlalawigan at munisipal na nahaharap sa kasong panggagahasa sa Brgy. Camachile, DRT, Bulacan kamakalawa.

Ayon sa ulat ni PCpt. Marc Henry SJ. Gonzales, hepe ng Doña Remedios Trinidad Municipal Police Station, kinilala ang akusado na isang 42-anyos na lalaking caretaker, nasa Top 4 Most Wanted sa provincial level at Top 1 Most Wanted Person sa municipal level, na residente ng Sitio Durumugan, Brgy. Kalawakan, DRT, Bulacan.

Siya ay inaresto ng pinagsanib na puwersa ng DRT MPS Tracker Team at RIU 3 Bulacan West sa bisa ng Alias Warrant of Arrest para sa kasong Statutory Rape na inisyu ni Judge. Jonathan Patrick Ayon-Ayon De Ala, Presiding Judge ng RTC Branch 18, Malolos City, Bulacan noong Agosto 1, 2021 na may rekomendasyong “No Bail.”

Matapos maaresto, ipinaalam sa akusado ang kanyang mga karapatang naaayon sa Konstitusyon gayundin ang Miranda Rights at kasalukuyan siyang nasa kustodiya ng DRT MPS para sa kaukulang disposisyon at pagbabalik ng nasabing warrant sa korte na naglabas nito.

“Ang matagumpay na operasyong ito ay patunay ng matatag na paninindigan na protektahan ang mamamayan at panatilihin ang kapayapaan at kaayusan sa lalawigan ng Bulacan,” pahayag ni PColonel Jay B Baybayan, officer-in-charge ng Bulacan Police Provincial Office. (MICKA BAUTISTA)