Donnelly, Hayashi namayani sa Subic Bay Int’l Triathlon; tutungo sa World Cup

SUBIC – Dinomina ng Canadian na si Liam Donnelly ang sprint elite men’s division ng 2026 NTT AST Subic Bay International Triathlon (SuBIT) na ginanap sa Subic Bay Freeport Zone sa Zambales noong Sabado.

Ang 26-anyos mula Ontario ay nagtala ng oras na 56 minuto at 16 segundo sa event na binubuo ng 750-meter (swim), 20-k (bike), at 5-k (run), na inaprubahan ng Asia Triathlon at World Triathlon.

“Ito ang unang beses ko sa Pilipinas. Napakaganda ng bansa. Mabait ang mga tao, napaka-friendly at welcoming, at magalang. Isang kasiyahan ang makapunta sa napakagandang bansa,” ani Donnelly, miyembro ng national team, saad sa media.

“Pupunta ako sa World Cup sa China sa susunod na linggo kaya ang plano ay magsimula ng season dito sa Pilipinas. Maganda ang manalo. Mainit dito at mabilis ang ruta, kaya sinubukan kong manatiling kontrolado sa buong karera,” dagdag niya.

Pumangalawa si Daryn Konysbayev ng Kazakhstan (56:28), kasunod si Takuto Oshima ng Japan (56:50).

Noong nakaraang taon, nagtapos sa una at pangalawang puwesto sina Oshima at Konysbayev sa standard distance na may 1.5-km (swim), 40-km (bike), at 10-km (run).

Si Iñaki Lorbes ang nanguna sa mga Pilipino sa oras na 58:57, sinundan nina Andrew Kim Remolino (1:00:01), Dayshaun Ramos (1:01:35), Matthew Justine Hermosa (1:01:37), at John Chicano (1:02:08).

Sa women’s division, nagwagi ng gintong medalya ang Japanese na si Hayashi Manami sa oras na 1:02:29 habang ang kanyang nakababatang kapatid na si Ayame ay nakakuha ng pilak (1:02:40). Nakuha ni Sinem Francisca Tous Servera ng Türkiye ang tanso (1:02:53).

Ang 22-anyos na si Manami, na nanalo rin sa SuBIT standard crown noong nakaraang taon, ay sasali rin sa World Triathlon Cup sa Chengdu sa Mayo 9 at 10, at sa Asia Triathlon Cup sa Osaka, Japan sa Mayo 25 at 26.

Sa mga Pilipina, si Faith Raven Alcoseba ay nasa ika-16 na puwesto (1:04:58), si Samantha Corpuz ika-26 (1:11:21), si Mikele Katerina Jopson ika-28 (1:14:37), si Dhana Victoria Seda Lomboy ika-29 (1:16:19), at si Nicole del Rosario ika-31 (1:17:53).

Samantala, si Anisha Eunice Caluya ang nagbigay ng nag-iisang medalya para sa Pilipinas sa torneo na inorganisa ng Triathlon Philippines at sinuportahan ng Subic Bay Metropolitan Authority at Philippine Sports Commission, NTT, Gatorade (opisyal na katuwang sa hydration), Western Guaranty Corporation, C-Vitt, at Subic Bay Travelers Hotel (opisyal na hotel ng karera).

Nagtala si Caluya ng 1:11:48 upang pumangatlo sa junior elite women, kasunod nina Alua Nurmuhamet ng Kazakhstan (1:11:12) at Kaleriya Shneider (1:11:18).

Sa junior elite men, nakuha ni Ramazan Ainegov ng Kazakhstan ang gintong medalya (1:01:55), tinalo sina Cooper Smeulders ng Australia (1:02:56) at Taeil Jun ng South Korea (1:03:46).

Nagtapos si Ainegov sa ikaapat na puwesto sa 2026 Asian Beach Games sa Sanya, China, at nakakuha rin ng tansong medalya sa Asia Triathlon Junior at Under-23 Championships sa Hong Kong noong nakaraang buwan.

Samantala, dinomina ni Nurmuhamet ang 2025 Asian Triathlon Youth at U-15 Championships sa Jeddah, Saudi Arabia.

Si Peter Sancho del Rosario ng Santa Rosa, Laguna ay nagtala ng 1:04:29 upang pumangatlo sa ikalimang puwesto overall, kasunod ni Rhys Cameron ng Australia (1:04:14), habang sina Euan Arrow Ramos (1:05:01) at Darell Bada (1:05:39) ay nagtapos sa ika-pito at ika-siyam, ayon sa pagkakasunod.

“Umaasa akong makakuha ng personal best at hindi ko inaasahang maging No. 1 Filipino finisher,” ani ng 16-anyos na si Del Rosario, na nagtapos sa ikatlong puwesto noong nakaraang taon sa likod nina Bada at Ramos.

Ang SuBIT, na isang mahalagang bahagi ng Asia Triathlon Cup series at isang mahalagang event para sa mga atleta na naghahangad ng world ranking points at international exposure, ay magpapatuloy ngayong Linggo para sa age-group category. (TriPhil/HNT)