HATAW! D'yaryo ng Bayan hatawtabloid.com
SUBIC – Tagumpay sina Diego Jose Dimayuga at Lauren Lee Tan sa Under-15 division ng Subic Bay International Triathlon (SuBIT) na ginanap sa Subic Bay Freeport Zone sa Zambales noong Linggo.
Tinapos ni Dimayuga ang boys’ super sprint race (375m (swim), 10km (bike), at 2.5km (run) sa oras na 35 minuto at 59 segundo.
Pumangalawa ang kanyang kakamping si Pio Mishael Gabriel (36:31), habang pumangatlo si Cebuano Joseph Ian Caluste ng Be Tritans (36:58).
Nakibahagi rin sa tagumpay si Tan matapos manguna sa girls’ division sa oras na 38:25.
Ang nakababatang kapatid ni Diego na si Naomi Rosalie ay nagtala ng 39:10 upang makuha ang silver medal, habang ang Filipino-French na si Alaina Bouffaut (40:15) ay nagkamit ng bronze medal.
“May sakit ako ng dalawang linggo. Isang linggo lang ako nakapagsanay para sa tournament na ito,” ayon sa 15-anyos na si Dimayuga mula sa Silang, Cavite.
Inulit nina Dimayuga, Latonio, at Caluste ang kanilang mga performance sa National Age Group Triathlon na ginanap noong Pebrero.
Si Dimayuga, na nakapasok din sa national team noong Enero, ay sasabak sa Asian Youth Championships sa Xuzhou, China sa Hunyo 13 at 14.
“Excited akong kumatawan sa bansa at sa aking koponan (Get Coach’d Academy). Gagawin ko ang lahat para manalo,” ani Dimayuga.
Samantala, ang miyembro ng Qatar national team na si Anes Khelili ay nagtala ng 1:06:36 upang talunin sina Jarius Miguel Mejia ng De La Salle Zobel Triathlon Team (1:06:38) at Lorenzo Claur ng Baguio Benguet Triathlon (1:06:48) sa standard men 16-19 years division ng event na inorganisa ng Triathlon Philippines at sinuportahan ng Philippine Sports Commission at Subic Bay Metropolitan Authority.
“Gagawin ko ang aking makakaya. Isang karangalan ang makalahok at pagkakataon ito upang mapaunlad ang aking kakayahan at mapabuti ang aking ranggo sa Asya,” sabi ng 16-anyos na si Khelili.
“Napakahirap ng ruta. Mas mainit ang panahon dito kaysa sa aming bansa. Sana ay makabalik ako sa susunod na taon,” dagdag pa ng magtatapos na Grade 12 student mula sa Al Andalus School sa Doha.
Sa women’s division, nagwagi si Naomi Felicity Aytin ng BYBS/GAS Coaching (1:23:33) laban kina Fynley Quiban (1:25:25) at Keirstein Ann Marie Tigullo (1:27:23).
Ang mga kampeon sa super tri-kids category ay sina Marcus Jayden Balaquit at Danica Mireille Angodung (11-12), Rey Matthew Tundayag at Maiko Aleno (9-10), Ethan Geronimo at Jan Christel Culanag (7-8), at Thirdy Geronimo at Lucia Ysabel Sarmenta (6 below).
Iba pang nagwagi sa standard age-group men’s division ay sina Earl James Ting ng Be Tritans (20-29), Samuel Ebuen Bada ng Olongapo Junior Trackers Multisport (30-39), Raffy Dolor ng Artemis-Victory (40-49), John Erich Taca ng Team Megawide (50-59), at Diosdado Soriano ng BOST (60 over).
Sa women’s division, ang mga gold medalist ay sina Jan Mikaela Caruncho ng 2600 Tri Team (20-29), Sandra Inocillas-Pineda ng Sante Barley Tri Team (30-39), Lady Ro Anne Alviar ng UPLB Trantados (40-49), at Maria Beatriz Azcuna ng Beer Racer Beer (50 over). (TriPhil/HNT)
