HATAW! D'yaryo ng Bayan hatawtabloid.com
ni MICKA BAUTISTA
DEAD ON THE SPOT ang isang binatang estudyante nang bumangga ang sinasakyang bisikleta sa isang ‘mapanganib’ na poste sa Sitio Gulod, Brgy. San Jose Patag, Santa Maria, Bulacan.
Kinilala ang biktima na si Arjun “Noy” Sanosa, isang 23-anyos working student, residente sa nabanggit na lugar.
Napag-alamang ang biktima ay nanghiram ng bisikleta sa kaibigan upang magpapalit ng pera sa labasan ng kanilang sitio.
Nang pauwi na at habang nasa papalusong na bahagi ng kalsada, biglang sinabing nawalan ng preno ang sinasakyang bisikleta.
Hindi na umano nakontrol ng biktima ang manibela ng bisikleta kaya dere-diretsong bumulusok sa poste na naging sanhi ng kanyang kamatayan.
Ayon sa residenteng si Ramon Magdalena, nakatatakot at nakalulungkot ang nangyayari sapagkat limang buhay na ang nawala sa tinagurian nilang “killer poste” sa Sitio Gulod, San Jose Patag.
Aniya, ang apat pang biktima ng ‘killer poste’ ay kinilalang sina alyas Ricky F, alyas Jayjay A., pawang taga-Sitio Gulod din, at dalawa pang mga residente sa Brgy. Catmon.
Dagdag niya, hindi na ito simpleng insidente ng disgrasya kundi malinaw na may problema na kailangang aksiyonan upang hindi na madagdagan pa ang biktima ng naturang ‘killer poste’.
Kaya panawagan ng mga residente sa mga kinauukulan, ayusin o ilipat ang poste dahil delikado ang kinatatayuan nito o kaya ay maglagay ng warning signs, ilaw, o harang para maiwasan ang disgrasya.
Nagtatanong rin ang mga residente kung sino ang may pananagutan sa bagay na ito, local government unit (LGU), electric company, o ang contractor?
Ani Magdalena, dapat may malinaw na imbestigasyon at dapat managot kung may kapabayaan.
