HATAW! D'yaryo ng Bayan hatawtabloid.com
NAARESTO ng mga awtoridad ang isang pinaghihinalaang lider ng gang na sangkot sa 2025 Trillion Peso March riots sa bayan ng Guimba, lalawigan ng Nueva Ecija, dahil sa magkahiwalay na kasong kriminal.
Kinilala ang suspek sa alyas na Primo, at pinaniniwalaang pinuno ng Temple Street Gang, na ang mga miyembro ay kabilang sa mga naaresto dahil sa pag-uudyok ng kaguluhan sa panahon ng mga protesta.
Ayon kay NCRPO Regional Director P/Maj. Gen. Anthony Abedrin, ang posibleng papel ni alyas Primo ay tila pinuno ng gang, gayon man, wala pa silang nakakalap na ebidensiyang pisikal na siya’y naroroon sa pinangyarihan.
Dagdag ng opisyal, bilang pinuno, dapat managot ang suspek sa mga aksiyon ng kaniyang grupo, at pinaniniwalaan na may kaalaman siya sa mga pangyayari noong September 2025 Trillion Peso March.
Inilinaw ni Aberin na si alyas Primo ay inaresto sa bisa ng isang warrant para sa pagnanakaw na may pananakot at pagpatay, at hindi direkta para sa kaniyang pagkakasangkot sa mga kaguluhan sa protesta.
Ayon sa pulisya, 12 taon nang nagtatago ang suspek bago tuluyang nadakip.
Dagdag ng opisyal, mahalaga ang pagkakaaresto sa suspek dahil isa siyang lider ng gang at sangkot siya sa maraming kaso.
Nasa kustodiya ngayon ng NCRPO si alyas Primo habang patuloy ang pangangalap ng mga awtoridad ng ebidensiya na maaaring mag-ugnay sa kanya sa Trillion Peso March riots. (MICKA BAUTISTA)
