HATAW! D'yaryo ng Bayan hatawtabloid.com
ni Teddy Brul
ISA sa mga pinakatahimik at sagradong destinasyon ng mga deboto ngayong Semana Santa ay ang Pink Sisters Convent—isang santuwaryo ng katahimikan at panalangin na mainam puntahan sa Visita Iglesia.
Ang Visita Iglesia ay isang tradisyong Katoliko ng mga Filipino tuwing Huwebes Santo, kung kailan binibisita ang pito o 14 na simbahan upang magnilay sa pagpapakasakit ni Hesukristo.
Para sa mga naghahanap ng payapang lugar na malayo sa ingay ng lungsod, bukas ang Pink Sisters Convent sa Tagaytay at Baguio City
Matatagpuan ang kumbento sa Holy Spirit Drive, Barangay Maitim 2nd East, Tagaytay at sa Brent Road, Baguio City na kilala bilang kanlungan ng katahimikan kung saan maaaring magnilay at manalangin nang taimtim.
Para naman sa mga taga-Metro Manila na magsasagawa ng Visita Iglesia—kahit naglalakad o nagbibisikleta—maaari rin isama sa kanilang panata ang St. Joseph Convent of Perpetual Adoration sa New Manila. Isa rin itong kilalang lugar ng taimtim na panalangin at pagninilay.
Sa mga kapilyang ito, maaaring magsumite ng panalangin at mga kahilingan ang mga deboto na ipinagdarasal ng mga madre ng Sister Servants of the Holy Spirit of Perpetual Adoration, isang kongregasyong nakatuon sa walang tigil na pagdarasal at pagsamba.
Nakasuot ng kulay rosas na abito—simbolo ng kagalakan sa Espiritu Santo—ang mga madre ay nagpapatuloy sa 24-oras na pag-aalay ng panalangin sa harap ng Banal na Sakramento.
