Datem, DMCI at iba pang major construction firms tutulong kay PBBM

SIPAT
ni Mat Vicencio

INAASAHANG magiging maayos at matino ang pagpapatupad ng susunod na malalaking infrastructure projects sa bansa sa pagpasok ng major construction companies sa ilalim ng kasalukuyang pamahalaan ni Pangulong Ferdinand “Bongbong” Marcos, Jr.

“Inimbitahan tayo ng group of the quadruple-A contractors, ‘yung malalaki talagang kompanya na hindi typically sumasali sa DPWH at nakita nila ‘yung mga plano ng Pangulo. Inexpress nila ‘yung kagustuhan nilang tumulong at mag-participate,” pagbubunyag ni DPWH Secretary Vince Dizon.

Ilan sa malalaking construction companies na nakipagpulong kay Dizon kamakailan ay DATEM, DMCI, EEI, AG&P, Magawide, Sta. Clara, Makati Development Corporation/Ayala, Hillmarc’s Construction Corporation at iba pa.

Tututukan ng mga major construction companies ang mga pangunahing infrastructure projects ng pamahalaan lalo na ang rehabilitasyon ng Maharlika Highway at konstruksiyon ng mga classroom sa buong bansa.

Kung tutuusin, kaya hindi sumasali ang mga major construction companies sa mga government projects ay dahil umiiwas sa malaganap na korupsiyon sa gobyerno lalo na sa mga isinasagawang proseso ng bidding.

“Yung totoo, hindi nila ma-take ‘yung corruption. Hindi sila papasok sa ganun. Pero ngayon, nakikita nila na, through the effort of the PBBM administration, meron mga pagbabagong nangyari,” paliwanag ni Dizon.

Sa pagpasok ng malalaking construction firms, inaasahang hindi na mangyayari ang tinatawag na ‘patsi- patsing’ trabaho sa mga kalsada na gagawin sa Maharlika Highway. Ang humigit kumulang sa 3,000-kilometer highway ay sakop ang ilang lugar sa Luzon, Visayas, at Mindanao.

                Ang rehabilitasyon ng nasabing highway ay magsisimula ngayong taon.

Sabi pa ni Dizon, “Meron sila nung financial capability at technical expertise na talagang mag-implement ng project na maayos. They will never compromise quality at hindi sila made-delay.”

Dagdag pa ni Dizon, “We’re looking at four to five contractors. ‘Yung parte ng Region 4A, mostly sa Quezon, ‘yung Andaya highway, kasama na rin ang parts of Albay, Samar, pero napakahaba ng Samar nakita naman natin, baka ‘yun bibiyakin pa ‘yun further.”

Kabilang din sa tututukan ng mga major construction companies ang pagsasaayos ng tinatawag na classroom backlog na umaabot na sa ngayon na 165,000.