Pilipinas haharap sa Iran sa gitna ng tensiyong political

GOLD COAST, Queensland — Haharap ang Philippine women’s football team sa Iran ngayong Linggo sa Cbus Super Stadium sa Gold Coast, Australia, sa gitna ng umiinit na tensiyong politikal na kinasasangkutan ng bansang Iran.

Inaasahang mahigpit ang seguridad sa laban habang target ng Philippine squad na malampasan ang Iranian Lionesses upang makausad sa group stage ng 2026 AFC Women’s Asian Cup.

Magsisimula ang laban alas-5 ng hapon (oras sa Maynila) sa stadium na matatagpuan sa Robina.

Ayon kay coach Alen Stajcic Torcaso, isang matinding kalaban ang Iran.

“Makakatapat namin ang isang matibay na koponan. Naniniwala kaming magbibigay ang Iran ng matinding laban gaya ng ipinakita nila sa kanilang huling dalawang laro,” ani Torcaso sa pre-match press conference noong Sabado.

Suportado ang kampanya ng Pilipinas ng Philippine Football Federation at Philippine Sports Commission.

Samantala, naglalaro ang Iranian Lionesses habang nahaharap ang kanilang bansa sa malaking alitang militar na kinasasangkutan ng Israel at United States. Batid ng mga manlalaro ang nagaganap na sitwasyon sa kanilang bansa.

Hindi makakalaro ang dalawang Iranian players dahil sa pinsala matapos ang kanilang pagkatalo laban sa South Korea at Australia.

“We have played two hard games against Australia and Korea. The Philippines is a good team and we have analyzed their game. We will try to show our best performance,” pahayag ni Iran coach Marziyeh Jafari.

Pinahigpit din ang seguridad matapos mapansin ng Queensland police ang presensya ng mga nagpoprotesta sa labas ng stadium noong Huwebes, ayon sa ulat ng lokal na media.

Kailangang mapabilang ang Pilipinas sa dalawang pinakamahusay na third-placed teams sa group stage upang makapasok sa playoffs.

Ang dalawang nangungunang koponan mula sa bawat grupo ay awtomatikong papasok sa playoffs. Sa Group A, nangunguna ang South Korea na may 2-0 record, habang tinalo ng host Australia ang Iran, 4-0, sa harap ng halos punong stadium.

Sa Group B, tinalo ng North Korea ang Bangladesh sa Sydney upang makasama ang China sa pagkuha ng puwesto sa susunod na round.

Samantala, tinutukoy pa ng Japan at Vietnam ang kanilang kapalaran sa Group C, na may natitira pang laban kontra Chinese-Taipei at India sa Perth.

Sa kasalukuyan, nakikipaglaban ang Pilipinas, India at Uzbekistan para sa dalawang puwesto bilang pinakamahusay na third-placed teams na makakapasok sa playoffs. (PSC/HNT)