HATAW! D'yaryo ng Bayan hatawtabloid.com
NASAMSAM ang hindi bababa sa P142,800,000 halaga ng hinihinalang shabu, habang nadakip ang dalawang pinanininiwalang mga big time na tulak sa ikinasang buybust operation ng Philippine Drug Enforcement Agency (PDEA) sa Brgy. Sto. Domingo, lungsod ng Quezon, nitong Miyerkoles ng madaling araw, 11 Marso.
Ayon kay PDEA Director General Isagani Nerez, isinagawa ang operasyon dakong 3:10 ng madaling araw kahapon sa Biak Na Bato St., sa nabanggit na barangay, ng mga tauhan ng PDEA Special Enforcement Service (SES), PDEA Regional Office-National Capital Region (RO-NCR) Quezon City District Office, PNP Drug Enforcement Group Special Operations Unit – NCR.
Kinilala ang mga suspek na sina alyas Eli, 28 anyos, residente sa Baliwag, Bulacan; at alyas Rolando, 42 anyos, taga-lungsod ng Caloocan, kapwa rider ng motorcycle taxi.
Nakompiska mula sa mga suspek ang tinatayang 21 kilo ng hinihinalang shabu na nakasilid sa plastic container, buybust money, isang Toyota Hi-ace Grandia, sari-saring ID, mga cellphone, at digital weighing scale.
Pahayag ni Nerez, posibleng ipakakalat ang nasabat na ilegal na droga sa Metro Manila at ilang karatig lalawigan.
Nakatakdang sampahan ang mga suspek ng mga kasong paglabag sa Section 5 (Sale of Dangerous Drugs), Section 11 (Possession of Dangerous Drugs), at Section 26 (Conspiracy to Sell) sa ilalim ng Article II, RA 9165 o Comprehensive Dangerous Drugs Act of 2002. (ALMAR DANGUILAN)
